Ang Kulturang Iluko sa Pilosopiyang Bayan Ang pag-aaral sa panitikang Iluko ay hindi lamang isang pag-aaral sa kasaysayan nito kundi pati na rin ang pag-unlad ng kulturang Iluko. Ang panitikan ay tinitignan bilang isang dokumentong panlipunan dahil hindi ito isang uri ng sining lamang kundi ayon kay Richard G. Moulton ay isang kombinasyon ng sining at pilosopiya. Marami ang nakasulat tungkol sa mga Ilokano nguni't iilan lamang ang nakakaintindi sa kanila. Upang lubusan natin maunawaan …showed first 75 words of 1574 total…

…showed last 75 words of 1574 total…rief Survey Of Iloko Literature. Manila: Oriental Printing, 1936. Foronda, Marcelino Jr. Dallang: An Introduction to Philippine Literature in Ilokano and Other Essays. Hawaii: University Of Hawaii, 1978. Rosario, Joan. "Ilocano." litera1no4.tripod.com/ilokano_frame.html Pacris, Ben. "Ilocano Lowland Cultural Community." http://www.ncca.gov.ph/phil._culture/traditional_arts/lowland/lowland_ilocano.htm Rambaud, Clesencio. "Preserving the Ilocano Identity." http://www.philpost.com/0799pages/ilokano0799.html